Notontosaina androany 7 aprily 2025, tao amin’ny Gymnase couvert Mahamasina ny hetsika “Mandinika Aloha”, izay nokarakarain’ny Ministeran’ny Fampianarana Teknika sy ny Fanofanana Arak’asa, niaraka tamin’ireo rantsa-mangaika. Nanokatra ny hetsika Ramatoa Minisitra RASOLOARISOA Marie Marcelline, notronin’ny solombavambahoaka voafidy tao amin’ny distrikan’Antananarivo faha efatra, Andriamatoa RAFIDIMANANA Désiré, ary ny ben’ny tanànan’Antananarivo renivohitra, Ramatoa RAMANANTSOA Harilala. Nanomboka teto Antananarivo ny hetsika ary mbola hotohizana any amin’ny faritany dimy hafa.
Ny tanjon’ny “Mandinika Aloha” dia ny hanatsarana sy hanavaozana ny kalitaon’ny fampianarana teknika amin’ny alalan’ny fandaharam-piofanana mifanaraka amin’ny filàn’ny sehatry ny asa. Anisan’izany ny fanatanterahana ny « alternance », izay mikendry ny hanamora ny fidiran’ny tanora eo amin’ny tontolon’ny asa amin’ny alàlan’ny fampifandraisana akaiky ny fiofanana sy ny asa eny amin’ny orinasa.
Miisa 700 ny mpandray anjara tamin’ity hetsika ity, anisan’izany ireo mpampiofana, talem-paritra, talen’ny ivon-toeram-panofanana, ary ny tompon’andraikitra avy amin’ny ministera. Nifampidinika izy ireo momba ny fanatsarana ny fandaharam-piofanana amin’ny sehatra toy ny Tourisme, Hôtellerie, Restauration (THR), Textile, Habillement et Accessoires (THA), Art et Technique (ART), Tertiaire, Industriel, ary Génie Civil.
Notsiahivin-dRamatoa Minisitra fa dingana lehibe amin’ny fananganana hoavy mamiratra ho an’ny tanora ny hetsika toy izao, ary ny fampianarana teknika sy ny fanofanana arak’asa dia manana anjara lehibe amin’ny fanatanterahana izany, ary mitondra fampandrosoana ho an’ny firenena.
