Ny asabotsy 25 febroary 2023, vokatry ny fiaraha-miasa matotra eo amin’ny Association Eau-Soleil PACA, ny Promabio sy ny Nielsen-Massey, dia notokanana, ny fotodrafitr’asa toeram-panovozan-drano na ny “bornes fontaines” tao Ampohibe Antalaha. Tonga nanome voninahitra ny fotoana ny Ministry ny Fampianarana Teknika sy ny Fanofanana arak’Asa, VAVITSARA RAHANTANIRINA Gabriella, Andriamatoa Bernard Caufape, lehibe mpitarika ny ny fikambanana “Eau Soleil PACA” sy ireo manam-pahefana ao an-toerana.
Fotodrafitr’asa izay misy ny asa-tanan’ireo mpiofana avy ao amin’ny LTP Antalaha sy LTP Sambava. Mpiofana miisa roapolo (20) ao amin’ny sampana BTP sy Électricité ireto tanora ireto, manana traikefa amin’ny fametrahana ny panneaux solaires izay mampandeha ny fanovozan-drano.
Tafiditra tanteraka ao anatin’ny Veliranon’ny Filoham-pirenena ny ezaka toy izao hoy hatrany Ramatoa Minisitra; misaotra sy mankatelina ny Association Eau-Soleil PACA, ny Promabio sy ny Nielsen-Massey, satria dia tanora mpiofana no afaka manovo fahalalana amin’ity tetikasa ity. Fa Indrindra ihany koa ny fisitrahan’ny mponina an’arivony avy ao Ampohibe ny rano fisotro madio noho ny fahavitan’izao fotodrafitr’asa izao.
Nanentana ihany koa Ramatoa Ministra ny amin’ny fikojakojana ny fananana iombonanana sy hitandro hatrany ny fahadiovana manodidina ny fatsakana, amin’ny maha sarobidy ny fahasalamana.
Marihina moa fa hisitraka ny fanatanterahana ny tetikasa famatsian-drano fisotro madio mandeha amin’ny herin’ny masoandro, ihany koa ny mponina manodidina ny LTP Sambava. Hanao fampiharana sy hanamafy fahaiza-manao amin’ny alalan’ny tetikasa ireo mpiofana avy ao amin’ny Lysea Teknika, miaraka amin’ny Association Eau-Soleil PACA, Promabio, Nielsen-Massey hatrany.
“Olo mahay raha tsy very mandeha”
© CELCOM METFP/ Febroary 2023
