🔴 Tovovavy vao erotrerony, no nisongadina ary nosokajiana ho “major de promotion” taorian’ny fitsapam-pahaizana, namaranana ny fanofanana “Mécanique moto-BAJAJ”, nokarakarain’ny Minisiteran’ny Fampianarana teknika sy ny Fanofanana arak’asa niaraka tamin’ny fikamabanana IO RENALA, tao Morondava, faritra Menabe. Androany zoma voalohan’ny volana Martsa 2024 no notoloran’ny Minisitra, Lalatiana RAKOTONDRAZAFY, mari-pankasitrahana fahavitana fiofanana izy, niaraka tamin’ireo mpiofana miisa 39 hafa.
🔴 Tsy mitsahatra mitombo araka izany ireo olona mahazo tombotsoa amin’ny fanofanana arak’asa karakarain’ny Minisiteran’ny Fampianarana teknika sy ny Fanofanana arak’asa. Na ny vehivavy koa aza dia maneho ny fahavononany hiatrika ny asa izay heverina hatrizay fa natokana ho an’ny lehilahy ihany, toy ny resaka “mécanique moto-BAJAJ”, ary hita fa tena misongadina izy ireo. Afaka manokatra avy hatrany ny “atelier” ho fanamboarana moto-BAJAJ, izay fitaovam-pifamoivoizana tena ampiasaina any amin’ny morontsiraka, ireo mpiofana ireo.
🔴 Naharitra herinandro ny fiofanana ary mpampianatra avy eo amin’ny Institut National de Promotion Formation (INPF) avy ao Ivato, Antananarivo no tonga nampiofana azy ireo. Araka ny voalazan’ny Filohan’ny Repoblika ombieny ombieny dia tsy misy distrika ho adino, indrindra amin’ny resaka fanofanana arak’asa ary mitovy lanja ny fiofanana omena ireo tanora, mba hahafahany mivoatra sy mahaleotena avy hatrany amin’ny lafin’ny asa.
🔴 “Tsy voatery hoe manana fitaovana lehibe, na toerana lehibe, vao afaka manokatra garazy, hanaovana ny asa amin’ny lafiny mekanika”, araka ny nambaran’ny Minisitry ny Fampianarana teknika sy ny Fanofanana arak’asa, Ramatoa Lalatiana RAKOTONDRAZAFY. Ankoatr’izay dia namporisika ireo mpiofana ny Minisitra ny tsy tokony hijanon’izy ireo amin’izay fahaizana sy fahalalana notovoiziny, fa mila mikarokaroka foana ny saina. Anisan’ny tarika ho an’ireto tanora ireto sahady amin’ny fikotrehana ny fananganana orinasa ho azy araka izany ny fampiofanana natao”.
“Olo mahay raha, tsy very mandeha”
