Notanterahina ny 26 Desambra 2024 tao amin’ny Amphi B an’ny Minisiteran’ny Fampianarana Teknika sy ny Fanofanana arak’Asa ny fanomezana ny tapakila fiaramanidina sy ny vatsin-dalana ho an’ireo mpianatra 18 mianadahy izay handrato fianarana 2 taona any Maroc.
Nitsodrano sy nirary soa azy ireo Ramatoa Minisitra Marie Marcelline Rasoloarisoa ary nasongadiny tamin’ny lahateny izay nataony fa ny Minisiteran’ny Fampianarana Teknika sy ny Fanofanana arak’Asa, eo ambany fiahian’ny fitondram-panjakana tarihin’Andriamatoa Filoham-pirenena, Andry Nirina RAJOELINA, dia kitro hifaharan’ny firenena, satria manan-danja amin’ny famolavolana olona izay hitarika sy hampandroso azy.
Noraisin’ny Minisitera an-tanana ny fikarakarana sy fandefasana ny mpianatra teny amin’ny Aéroport Ivato, ka tamin’ny 12 ora sy sasany alina no nitodi-doha ho any Maroc ny fiaramanidina nitondra azy ireo.
